Was ver en Tag! Gester isch d’letschti
Etappa va iischer Heimreis agstande. Va Bitsch uf Üsserbärg. En Wäg wasus
definitiv in schich kä het.
Ubernachtet heiwer z’Bitsch im
Schiesstand. Da siwer öi vaner Famili Schaller mit era hammer Lasagne zum z’Nacht
verwennt worde. Öi z z’Morgu am Samstag het kei Wiinsch offu glah! Merci
Villmal der ganz Famili.
Traditionsgemäss heiwer ver
iischi letschti Etappa es Mülti mit iisch mitgno. Z’Jaqueline isch de am morge
z’Bitsch zu iisch gstosse. Und schi het de öi en fittere Idruck weder der
grossteil vaner Mannschaft gmacht. Demnah hoch isch iirusch vorlgeiti Tempo
durch Natersch durch gsi. Uber d’rote Meile und dernah dum Rottu nah siwer de
am halbi elfi zum z’Mittag z’Brigerbad igetroffu.
Hie hetschich de gezeigt,
dass d’Chnotutechnik va iische Liit ver es Mülti ane Böim z’heftu no einiges an
Stiigrigspotential bietet. Iischers Jaqueline hetschich scho nach wenige Minüte
chennu befriee und het schini nöi gwunni Friiheit öi gat zimli intensiv ufer
Matta dernäbe üsgläbt.
Nachemu chleine Umwäg uber
Eyholz zum RRO, was es Apéro mit stattli Wasser gigäh het, heiwer de d’Astiigig
uf Eggerbärg in Agriff gno. Das iisch de alles öi rächt güet gange, bis zer
erschtu Brigga. Und nit appa, äs isch de nit gat di Golden Gate Bridge vam
Baltschiedertal, ehner so biz es paar Lädini uber es chleis Rinnsaal. Ver z’Jaqueline
aber scho zu viel des Guten. Wäder güet züerede, locke mit Brot und Epfla, oder
biz es offensivers Drängu, nix het ghulfu, der Fluss schiint unuberwindbar
zsii. Komischerwiis het de der Umwäg diräkt durch du Bach z’erwünschti Resultat
gebrungu.
Nach dum Üfstiig uf Eggerbärg
het nisch der Papa vam Omura mitme chalte Bier gwartet, und so der Schlussspurt
uf Üsserbärg igliitet. Das mit dum Schlussspurt isch de allerdings es biz ind
Hose. Z’Müülti het schich, wie scho bim Üfstiig uf Eggerbärg, vor der negscht
Brigga derzüe entschlosse nimme wiiterzlöife. So heiwer de z’Jaqueline miesse
verlade und so uf Baltschieder bringe, wa z’Theli de mit imu z’Füess ineru
Heldutat in Rekordziit uf Üsserbärg gseklut isch. Der Transport va Baltschieder
uf Üsserbärg isch anschiinend nit meglich gsi.
So heiwer de mit eppis
Verspätig mit Trummelwirbel, Fahne, und Jaqueline ufem Dorfplatz z’Üsserbärg chenne
imarschiere. Der Emfpang durch iischi Verwandtu, Bekanntu und Dozänte isch
absolut unbeschriiblich gsi. Es unvergässlichs Erläbnis het schich soo (langsam)
dum Endi züe gneigt. Nach diverse Aspraache heiwer de der Abu und somit öi
iischi Heimreis bi Raclette, Kaffe und Chüeche la üsklingu.
Was iisch jetzt no blibt isch
d’Erinnerig an en Hammer Wucha, mit unzählige Highlights, Emotione, Blaatre,
Schnittwunde, Sunnubränd und Begägnige! Äs isch iisch es Aligu, nisch hie momal
bi allne Liit z’bedanku, wa iisch in der Wucha unnerstütz hend. Sigs mit
Apéros, Ubernachtigsmeglichkeite, Verpgflegige, finanziell oder öi eifach durch
e güete Züespruch und es motivierends Wort!
Ew Allne:
MERCI VILLMAL!!!!
Statistik
Gluffni Schritta:
20‘523 (Total 126‘929)
Tagestipp vam Steffi:
Der Stefan het im Verlöif vaner Wucha schiini Stimm verlore. Darum leider kei Abschlusstipp va im ;-)
20‘523 (Total 126‘929)
Tagestipp vam Steffi:
Der Stefan het im Verlöif vaner Wucha schiini Stimm verlore. Darum leider kei Abschlusstipp va im ;-)
Held vam Tag:
Z’Theli: Will är mit der Jaqueline in Rekordziit va Baltschieder uf Üsserbärg gseklet isch, und iisch esoo der traditionell Imarsch ermeglicht het! Merci Villmal
Anzahl Blattre:
Alles egal, wier si acho
Anzahl Tüütera:
unzähligi uber di ganz Wucha, und an jedem heiwer en ens e Freid kä!
